પ્રસાદી સ્મારક

સર્વાવતારી ભગવાન શ્રીસ્વામિનારાયણે ભારતભરમાં તથા તેની આસપાસનાં અનેક પ્રદેશોમાં વિચરણ કરી પોતાનાં દિવ્ય ચરણકમળ અને અલૌકિક લીલાઓથી અસંખ્ય સ્થળોને પાવન અને પ્રસાદીભૂત કર્યાં છે. એ પ્રત્યેક પ્રસાદીભૂત સ્થાનની ઓળખ, મહિમા અને સ્મૃતિ હજારો વર્ષો સુધી અખંડ જળવાઈ રહે — એવી પાવન ભાવનાથી પ. પૂ. સદ્. શ્રીજ્ઞાનજીવનદાસજી સ્વામી-કુંડળધામની પ્રેરણા થઈ.

આ ઉદાત્ત ભાવનાને સાકાર કરવા સ્વામીશ્રીની પ્રેરણાથી શ્રીસ્વામિનારાયણ મંદિર-કુંડળધામ દ્વારા શ્રીહરિનાં આ પ્રસાદીભૂત સ્થાનો પર શ્વેત આરસપહાણની નયનરમ્ય ‘સ્મૃતિછત્રી’ઓનું નિર્માણ કરવામાં આવી રહ્યું છે. આ સ્મૃતિછત્રીઓ ભગવાન શ્રીસ્વામિનારાયણની દિવ્ય લીલાભૂમિની જાળવણી અને માવજત કરે છે, તે પવિત્ર સ્થાનની ચોક્કસ ઓળખ તથા ભૌગોલિક સ્થાન ચિરકાળ સુધી સુરક્ષિત રાખે છે, અને આવનારી પેઢીઓ — ભગવાન સ્વામિનારાયણના અનુયાયીઓ — ને હજારો વર્ષો સુધી એ સ્થાનનો મહિમા તથા જગ્યાની જાણકારી પૂરી પાડે છે. જેથી ભાવિક ભક્તો અહીં દર્શને આવી તીર્થ કર્યાનું ફળ પામે અને શ્રીહરિની સ્મૃતિમાં ભક્તિભાવથી તરબોળ થાય.